Копретседателите на групата Минск на ОБСЕ, Игор Попов (Русија), Стефан Висконти (Франција) и Ендру Шофер (САД), денеска изразија загриженост од развојот на ситуацијата во Нагорно Карабах, нагласувајќи дека веќе не смеат да паѓаат цивилни жртви во конфликтот.
„Ги повикуваме азербејџанскиот претседател, Илхам Алиев, и ерменскиот премиер, Никол Пашинијан, да преземат итни чекори за исполнување на сите заложби потпишани од двете страни во Москва на 10 октомври, со цел да се спречат катастрофалните последици по регионот“, се наведува во заедничкото соопштение на копретседателите на групата Минск на ОБСЕ.
Во соопштението тие додаваат дека „цивилните жртви се апсолутно неприфатливи“.
„Бараме итен прекин на огнот, враќање на одземеното и размена на воените заробеници. Копретседателите веќе разговараа со министрите за надворешни работи на двете земји, Зохраб Мнаѕаканијан и Чејхун Бајрамов, за изнаоѓање начин за почеток на преговори и решение“, заклучи групата.