Министри за правда од целиот свет ќе се сретнат денеска во Лондон за да разговараат за зголемување на поддршката за Меѓународниот кривичен суд откако минатата недела издаде налог за апсење на рускиот претседател Владимир Путин. МКС го обвини Путин за воено злосторство за незаконско депортирање на стотици деца од Украина.
Москва ги отфрла обвинувањата, нарекувајќи го потегот неприфатлив и нагласува дека тој нема правна сила во Русија, која не е членка на судот. „Денес се собираме во Лондон обединети со една цел – да ги повикаме воените злосторници одговорни за злосторствата извршени во Украина за време на оваа неправедна, неиспровоцирана и незаконска инвазија“, рече британскиот вицепремиер Доминик Рааб.
Домаќини ќе бидат Велика Британија и Холандија
„Обединетото Кралство, заедно со меѓународната заедница, ќе продолжи да му обезбедува на Меѓународниот кривичен суд ресурси, луѓе и експертиза за да се осигура дека правдата е спроведена“, додаде тој.
Велика Британија вети 1 милион фунти на МКС оваа година, а Министерството за правда соопшти дека се очекува и други земји да ветат финансиска поддршка за време на конференцијата во Лондон, чиј домаќини ќе бидат Велика Британија и Холандија. Средствата ќе бидат искористени за обука на инспектори за истрага на наводните воени злосторства, како и психолошка и практична поддршка за жртвите, објави Министерството.