Либанскиот министер за внатрешни работи Нухад Машнук соопшти дека се уапсени девет лица, меѓу кои седуммина Сиријци, во врска со самоубиствените напади во четвртокот во Бејрут, во кои беа убиени 44 лица, а 239 беа повредени.
За нападите одговорноста ја презеде групата „Исламска држава”.
– Досега уапсивме седуммина Сиријци и двајца Либанци, изјави Машнук. Тој прецизираше дека меѓу уапсените има Либанец кој сакал да изврши самоубиствен напад и криумчар на луѓе, кој помогнал на некои од уапсените да ја преминат границата со Сирија.
– Целата мрежа и нејзините соработници се уапсени за 48 часа по нападите, додаде министерот за внатрешни работи. Тој прецизира дека планот бил петмина напаѓачи-самоубијци да се саморазнесат во болница во јужно предградие на Бејрут.
– Сепак им било наложено да изберат друга цел поради мерките за безбедност околу болницата, истакна Машнук.