Околу 600 милиони луѓе низ светот годишно заболуваат од конзумирање на загадена храна, а 420.000 од нив умираат, според СЗО.
Овие смртни случаи можат да се избегнат со заеднички напори, потсети Светската здравствена организација на Денот на безбедноста на храната.
– Ние имаме колективна одговорност да обезбедиме здрава и свежа храна, изјави генералниот директор на СЗО, Тедрос Аданом Гебрејесус, во пораката за одбележување на Денот на безбедноста на храната, нагласувајќи дека децата се најранливи од тој проблем.
Тој нагласи дека „никој не смее да го загуби својот живот, обидувајќи се да јаде“, истакнувајќи ја одговорноста на производителите, владите, транспортните компании, продавниците и рестораните за безбедноста на храната.
– Подобрувањето на безбедноста на храната која ја консумираме, не само што ја намалува смртноста кај децата и неухранетоста, туку овозможува децата да пропуштаат помалку училишни часови, а возрасните да ја подобрат својата продуктивност и да го намалат притисокот врз здравствените системи, заклучи шефот на СЗО.