Најмалку 300 училишта во Италија денеска беа евакуирани откако преку електронска пошта добиле закани дека во нив се поставени бомби. Заканувачки пораки добиле и голем број училишта во Северна Ирска.
Италијанскиот министер за образование, Џузепе Валдитара, изјави дека се претпоставува оти станува збор за лажни закани, но предупреди дека бројот на училиштата што добиле вакви пораки може дополнително да се зголеми.
🔵Allarmi bomba nelle scuole italiane. La rivendicazione è arrivata da un sedicente #MikhailAndropov, riconducibile a un dominio di Taiwan della Dayeh University “Siamo venuti per annientarvi” si legge nel messaggio pieno di minacce. 300 gli istituti interessati in tutta Italia. https://t.co/whhY3hCQQc
— Rai Radio1 (@Radio1Rai) November 11, 2026
Едно училиште во Рим ги известило родителите дека сите ученици биле евакуирани на безбедно место и дека се под надзор на наставниците.
„По добиената дојава за бомба, сакаме да ве известиме дека сите ученици се на безбедно и се под надзор на наставниот кадар“, пишувало во пораката испратена до родителите.
Според копија од заканувачката порака до која дошол „Ројтерс“, таа била потпишана со името „Михаил Андропов, лидер на Вилајетот на Мизогинистан“. Истиот потписник претходно презел одговорност и за заканите со бомби испратени во петокот до редакции на медиуми во Ирска и Бугарија.
Во Северна Ирска, образовните власти соопштија дека полицијата не ги смета заканите за веродостојни, поради што на училиштата им било препорачано да продолжат со наставата.
Италијанскиот министер за одбрана Гвидо Крозето оцени дека заканите се дел од поширока стратегија за ширење страв и вознемиреност. Тој посочи дека зад ваквите инциденти не мора секогаш да стојат странски држави или непријателски организации, туку и поединци кои сакаат да привлечат внимание.
„Има и луѓе кои бараат внимание и психички нестабилни поединци, кои во вакви моменти едвај чекаат да предизвикаат страв во некој град или регион“, рече Крозето.
Заканите до училиштата се случуваат во период кога низ Европа се регистрирани и други слични инциденти. Во изминатите денови мета на сајбернапади и закани биле супермаркети, крвни банки, системи за контрола на воздушниот сообраќај и телевизиски куќи.
Европските власти изразуваат загриженост дека лажните дојави за бомби и сајбернападите би можеле да бидат дел од координирана кампања на таканаречени хибридни напади, насочени кон нарушување на функционирањето на земјите кои ѝ помагаат на Украина.
За дел од овие активности се обвинува Русија, но Москва негира вмешаност.