Товарниот брод „Карго Драгон“ на компанијата „СпејсИкс“ на Илон Маск, синоќа беше лансиран во орбита од стартна платформа на космодромот на НАСА на р’тот Канаверал на Флорида, соопшти Националната аеронаутичка и вселенска агенција на САД (НАСА).
„Карго Драгон“ треба да слета на Меѓународната вселенска станица (МВС) на 27 јули. Стартот на товарното летало до МВС е 18-то по ред во рамките на комерцијалниот договор помеѓу НАСА и „СпејсИкс“.
Бродот треба да изврши достава на МВС на околу 2,3 тони храна, опрема и материјали за научни експерименти. Дел од доставената техника е и космички биомедицински 3Д принтер разработен од американските компании „Текшот“ и „енСкрипт“. Принтерот ќе биде употребен за експерименти со 3Д печатење на срцеви влакна и органи.
Последен пат „Карго Драгон“ достави храна и друга опрема за експерименти на МВС на почетокот на мај. Тогаш на МВС беше донесен прибор за мерење на јаглеродниот диоксид во атмосферата на Земјата и испробана нова технологија на снопови на променливо рентгентско зрачење во Вселената.
„СпејсИкс“ е формирана во 2002 година од американскиот инженер и милијардер Илон Маск. Компанијата ги има разработено ракетите-носачи „Фалкон 1“, „Фалкон 9“ и „Фалкон Хеви“, како и вселенскиот товарен брод „Карго Драгон“. Ракетите-носачи се дизајнирани за повеќекратна употреба додека товарниот брод е специјално дизајниран за потребите на МКС. Компанијата исто така разработува и капсула за транспорт на астронаути во Вселената како и патничка верзија на вселенски брод.
Маск исто така е коосоновач на „Пејпал“ и производител на електрични автомобили „Тесла“.