Американскиот претседател Доналд Трамп изјави дека Канада е „една од најлошите земји во целиот свет“, во услови на зголемени трговски тензии меѓу Вашингтон и Отава.
„Проблемот е што тие беа многу неправедни кон Соединетите Американски Држави. Тие беа една од најлошите земји во светот. Знаете, се согласуваме со Кина, се согласуваме со луѓето и склучуваме добри договори“, рече Трамп во Овалната соба.
Тој додаде дека со Канада било „многу тешко“ да се соработува.
„На нашите земјоделци им наметнаа царини од 400 отсто и повеќе. Нè искористуваат“, рече американскиот претседател.
Изјавата доаѓа во период на дополнително влошување на трговските односи меѓу двете земји. На сила стапи забраната на Трамп за увоз на канадска стока во вредност од речиси една милијарда долари. Мерката опфаќа млечни производи, моторни возила и повеќе видови алкохолни пијалаци од Канада.
При потпишувањето на извршните наредби, Трамп како причина ја наведе, како што рече, „дискриминацијата“ кон американските производи.
Односите меѓу САД и Канада се значително влошени во текот на вториот мандат на Трамп. Покрај трговските спорови, дополнителни тензии предизвикаа и неговите изјави и потези поврзани со можноста Канада да стане дел од САД.
Ситуацијата дополнително се заостри во август по неуспехот на трговските преговори, по што двете земји воведоа меѓусебни царини.
Канадскиот премиер Марк Карни претходно овој месец изјави дека неговата земја премногу се потпирала на економските односи со САД.
„Последните 40 години беа период на длабока економска интеграција со Соединетите Американски Држави. Точно е дека тоа беше лесен пат, но поради тоа премногу се потпиравме на еден економски партнер. Јасно е дека тоа време заврши“, рече Карни во видеообраќање објавено на Јутјуб во почетокот на септември.