Американскиот претседател Доналд Трамп на прес-конференција во Белата куќа тврдеше дека Русите не успеале да го освојат Киев на почетокот на војната само поради погрешна стратегија.
„Русите ќе беа во Киев за 4 часа ако одеа по автопатот. Но, рускиот генерал донесе „брилијантна“ одлука да помине низ полињата наместо тоа. Врнеше силен дожд и тие тенкови се заглавија во калта. Не знам кој е тој генерал, но познавајќи го Владимир, веројатно веќе го нема“, рече Трамп.
Тој даде слично тврдење во интервју за Фокс њуз во мај.
Колоната руски воени возила во регионот на Киев на почетокот на војната се протегаше околу 55 километри. Колоната првично беше перцепирана како сериозна закана за Киев, но запре. Воените аналитичари веруваат дека причината за запирањето била недостаток на гориво и храна, а проблемот бил предизвикан и од украинските напади врз конвојот.
