Ново жариште на Ковид-19 е забележано во Холандија, откако завршил дводневниот музички фестивал „Феркнипт“ во градот Утрехт, јавуваат локалните медиуми. Речиси илјада новозаразени пациенти биле посетители на фестивалот.
„Феркнипт“ дневно имал околу десет илјади посетители.
Според податоците на локалната здравствена служба, на првиот ден од фестивалот, 3 јули, заразени се 448 посетители, додека следниот ден се регистрирани уште 516 нови случаи на Ковид-19.
„Се надевам дека сега сме на врвот“, изјави портпаролката на Министерството за здравство Лидија фан дер Меер, која додаде дека сепак очекува бројот на заразени да се зголеми во следните денови.
Според здравствените власти, организаторите на фестивалот се придржувале до сите епидемиолошки препораки и мерки – сите посетители морале да покажат потврда дека се негативно тестирани, вакцинирани или дека ја прележале болеста.