Авион-ловец „Ф-35 лајтнинг 2“ на американското воено воздухопловство се урна на пистата во воздухопловната база „Хил“, јужно од Огден во сојузната држава Јута. Нема повредени во инцидентот, јави телевизијата „Си-Ен-Ен“.
Во објавата на воздухопловната база „Хил“ дадена преку Твитер се посочува дека пилотот се катапултирал и е однесен во локалниот медицински центар.
?? | A US F-35 fighter jet has crashed on the runway at Hill Air Force Base in Utah. #USA pic.twitter.com/bkBlHcBBFQ
— Su-57 5th Gen Fighter (@5thSu) October 20, 2022
Причината за несреќата ќе ја покаже истрагата. По падот на авионот, избувнал пожар, кој се проширил на околу четири хектари, соопшти пожарникарската служба на Јута.
Пилотот се враќал во воздухопловната база „Хил“ од рутинска тренинг-мисија при што се катапултирал непосредно пред слетувањето, изјави пред медиумите полковникот Крег Андрел, командант на 388-то борбено крило на американските воздухопловни сили.
„Ф-35 лајтнинг 2“ е едномоторен, повеќенаменски борбен авион од петтата генерација, изработен во стелт-технологија за намалена воочливост на радарските системи. Тоа е најсовремениот и технички најнапредниот борбен авион на американската армија, наменет за остварување превласт на небото.