Жена која со нож нападна две лица на Тајмс сквер во Њујорк, при што едната жртва почина од здобиените повреди, e застрелана од полицијата откако вооружена со два ножа тргна да ги нападне и полицајците, соопшти њујоршката полиција.
🚨According to police reports, a woman allegedly confronted New York City Police Department officers with two knives shortly after stabbing two people in the abdomen. pic.twitter.com/5rfnFDd6Pb
— Christina Jovanovic🇺🇸 (@MAGATina63) September 1, 2026
Според АП, полицијата соопштила дека жената извадила два ножа од торба за пазарење и избодела 68-годишен маж во стомакот. Потоа и пришла на 32-годишна жена и ја избодела и неа во пределот на стомакот.
Двете жртви биле пренесени во болница. 32-годишната жена им подлегнала на повредите, додека мажот се наоѓа во стабилна состојба.
Инцидентот се случил во близина на полициска испостава, покрај зградата „One Times Square“, позната по традиционалното новогодишно одбројување и спуштањето на топката. Станува збор за една од најпосетуваните и најобезбедуваните локации во Њујорк.
На снимките објавени на социјалните мрежи се гледаат повеќе полицајци околу жената-напаѓач, која во рацете држи два големи кујнски ножа.
Еден од полицајците се обиде да ја совлада со електрошокер, но без успех. Жената потоа тргна кон полицајците, замавнувајќи со ножевите, по што повеќе припадници на полицијата пукаа кон неа.
Според изјава на очевидец пренесена од американските медиуми, полицајците пукале во жената двапати.
Полицијата засега не верува дека нападот бил поврзан со тероризам. Истражителите го испитуваат и менталното здравје на жената-напаѓач.