(ВИДЕО) Откриена e причината за трагедијата во Шпанија

Од:

Најмалку 50 лица загинаа, а десетици се повредени во утринскиот судир на два брзи воза во местото Урда, во шпанската покраина Толедо, потврдија шпанските служби. Додека спасувачките екипи и војската сè уште ги извлекуваат настраданите од уништените вагони на железничката линија Мадрид – Севиља, шпанското Министерство за транспорт ја означи човечката грешка на диспечерот на железничката инфраструктура како водечка хипотеза за причината за катастрофата, објави „АБЦ“, еден од највлијателните шпански дневни весници.

Според информациите од Министерството што ги пренесува „АБЦ“, трагедијата се случила за време на отстранување дефект на сигналниот систем. Техничар на јавниот железнички оператор „Адиф“ работел на поправка на главната сигнализација, но не го предупредил брзиот воз АВЕ дека на истата пруга, непосредно пред него, се наоѓа запрен воз на превозникот „Ирио“.

Првичната реконструкција на настанот на шпанската Цивилна гарда укажува дека двата воза во еден момент биле запрени. Меѓутоа, операторот потоа му дал дозвола и наредба на возот АВЕ да тргне, без воопшто да го извести машиновозачот дека композицијата на „Ирио“ сè уште стои на пругата пред него.

Бидејќи сигнализацијата не функционирала како што треба, АВЕ со полна брзина удрил во задниот дел на запрениот воз. Притоа, два вагона биле целосно уништени и исфрлени од пругата, надолу по железничкиот насип.

Сцените на местото на несреќата се потресни. Полицајците кои први пристигнале изјавиле дека телата на загинатите биле заробени во згмечената метална конструкција на вагоните.

Болниците во регионот Кастиља-Ла Манча и во Мадрид итно ослободуваат кревети на одделенијата за интензивна нега и ги подготвуваат операциските сали за прием на голем број тешко повредени. Во спортската сала во Урда е организиран прифатен центар за полесно повредените, како и за згрижување на семејствата на жртвите.

Несреќата веднаш отвори сериозни прашања за одржувањето на железничката инфраструктура во Шпанија, особено затоа што водечкиот синдикат на машиновозачи „Семаф“ уште претходно најавил 24-часовен штрајк за утре. Како причина за протестот синдикатот го посочил неспроведувањето на неопходните безбедносни мерки на брзите железнички линии и сè почестите дефекти на сигналните системи.

Министерот за транспорт Оскар Пуенте ги откажал сите обврски и се наоѓа во кризниот контролен центар, од каде што ја следи работата на итните служби и првичните резултати од истрагата.

Железничкиот сообраќај на брзата линија меѓу Мадрид и Андалузија е целосно прекинат до понатамошно известување. Истражителите во моментов ги сослушуваат дежурните техничари за да ги утврдат сите околности на кобниот пропуст.

Би можело да ве интересира

Шпанија: Еден специјалец е мртов, а на друг му е ампутирана ногата – настрадаа додека проверуваа сомнителен ранец

Идентификувани 56 од 69 жртви во железничката несреќа во Шпанија, за преостанатите 13 е потребна меѓународна соработка

ВИДЕО: Објавена снимка од разговор пред трагедијата, нереди во Мадрид

Шпанскиот контролен центар имаше 17 минути да го спречи судирот – никој не реагираше

А1он

Железничка несреќа во Шпанија: Најмалку 64 загинати, околу 80 се повредени

(ВИДЕО) Медиуми: Најмалку 50 загинати во железничката несреќа во Шпанија

Горан Наумовски