Началникот на Генералштабот на вооружените сили на Пакистан изјави дека во текот на ноќта во индиските воздушни напади загинале 26 цивили, а уште 46 се повредени.
Ова е значително зголемување во споредба со осумте смртни случаи пријавени претходно во текот на денот. Сè уште не е јасно дали оваа бројка се однесува на една локација или вклучува и жртви на ноќното прекугранично гранатирање долж Контролната линија.
Военото раководство на Пакистан соопшти дека земјата ќе одговори на индиските напади „во време, место и начин по сопствен избор“.
Индија изврши воздушни напади врз цели во Пакистан и пакистански Кашмир минатата ноќ, а Исламабад возврати со тврдење дека соборил пет индиски борбени авиони, во најлошиот вооружен конфликт меѓу двете нуклеарно вооружени држави во последните две децении.
Индиската страна објави дека биле погодени девет цели поврзани со „терористичка инфраструктура“, односно нападот на исламистичките милитанти врз хинду туристите во индиски Кашмир минатиот месец, во кој загинаа 26 лица. Нападот беше наречен „Операција Синдор“.
Индиските медиуми пишуваат дека името „Операција Синдор“ е референца на синдор, црвен прав што жените во Индија го носат во косата како знак дека се во брак.
Red sindoor embodies Shakti-divine feminine power. Worn at the hair-parting (ajna chakra), it ignites intuition, strength & spiritual clarity. A sacred mark of energy, wisdom & connection to the Goddess within. 🔥 pic.twitter.com/u6iYY5pmKy
— Arpit Gupta (@ag_arpit1) April 1, 2025
Се нанесува на разделување на косата и често е дел од хиндуските обичаи и ритуали, особено на свадби. Омажените жени го носат секојдневно, додека вдовиците не го носат.
За време на терористичкиот напад во Пахалгам, неколку жени ги загубија своите сопрузи кои беа убиени пред нивни очи. По нападот, на социјалните мрежи во Индија стана вирална фотографија од жена која седи во шок покрај телото на нејзиниот сопруг. Сцената стана симбол на терористичкиот напад во кој загинаа 26 лица.
Жената на фотографијата е Химанши Нарвал. Таа беше во брак со 26-годишниот поморски офицер Винеј Нарвал помалку од една недела. Парот бил на меден месец кога Винеј бил убиен.
Индиските медиуми пренесуваат дека „изворот“ тврди дека името Операција Синдор има за цел да ги хуманизира жртвите и да се погрижи нивната жртва да не биде заборавена.