Најмалку едно лице е убиено, а 13 се повредени, од кои некои се во критична состојба, во пукотница на семејна забава во Хјустон, Тексас, соопшти денес полицијата.
Помошничката началничка на полицијата во Хјустон, Патриша Канту, на брифинг за медиумите изјави дека полицијата привела неколку лица, но не е познато дали лицето одговорно за пукањето е приведено.
Таа истакна дека некои од ранетите лица биле оперирани откако биле транспортирани во болници, објави АП.
Канту изјави дека полицајците пристигнале на местото на настанот неколку минути по приемот на повикот и пронашле неколку ранети лица на различни локации околу куќата.
Таа рече дека се верува дека на семејната забава дошол непоканет гостин и бил замолен да ја напушти куќата, но потоа почнал да пука, што предизвикало другите луѓе да возвратат со оган.