25 луѓе загинале денеска во вооружен напад и престрелка меѓу криминални банди и полицијата во фавелата Жакарезињо во бразилската метропола Рио де Жанеиро, јавија локалните медиуми.
Полицијата интервенирала кога добила дојава дека бандите врбуваат деца за продажба на дрога, а во судирот на една метро-станица биле погодени двајца патници во воз, но тие се надвор од животна опасност.
Меѓу ранетите се тројца полицајци, од кои еден им подлегнал на повредите.
Од рано утрото, со часови постојано се слушало пукање во сиромашната населба во северниот дел на Рио, а локалните жители не смееле да ги напуштат своите домови. Осомничените се обиделе да избегаат преку покриви, кога полицијата со оклопни возила влегла во сиромашниот дел на Рио и над нив летале хеликоптери.
Ова е досега најсмртоносната полициска акција против бандите кои се занимаваат со продажба на дрога, но и доминираат со животот во бројните фавели, најсиромашните населби во бразилскиот велеград.
Меѓу загинатите во акцијата се неколкумина водачи на криминалната група, а уште десетмина осомничени членови се приведени, соопшти полицијата.