Финските гранични служби објавија снимки од операцијата во која запленија товарен брод за кој се сомнева дека оштетил телекомуникациски кабел што ги поврзува Хелсинки и Талин во Финскиот Залив.
Брод запленет во Финска оваа недела под сомнение дека оштетил подводен телекомуникациски кабел превезувал руски челик под санкции на Европската Унија, потврдија финските власти. Инцидентот се случи во време на зголемени тензии во регионот на Балтичкото Море, каде што земјите се во состојба на зголемена готовност поради низа оштетувања на клучната подводна инфраструктура, пишува Euronews.
🇫🇮Finland has released a video of the seizure of a Russian “shadow fleet” vessel
Fitburg was detained after an act of sabotage — the ship damaged an undersea communications cable linking Finland and Estonia.
The vessel was traveling from St. Petersburg to Haifa carrying… pic.twitter.com/KQMUO7bIxj
— NEXTA (@nexta_tv) January 4, 2026
Во среда, финската полиција го запре товарниот брод Fitburg, долг 132 метри, кој пловеше од рускиот Санкт Петербург до израелското пристаниште Хаифа. Сите 14 членови на екипажот беа приведени под сомнение дека сидрото на бродот оштетило телекомуникациски кабел во Финскиот Залив.
Со проверка на товарот, финската царина откри и потенцијално кршење на санкциите. „Прелиминарните информации укажуваат дека товарот се состоел од челични производи со потекло од Русија, кои се предмет на обемни санкции наметнати на Русија“, се вели во соопштението на финската царина.
Експертите проценија дека конструкцискиот челик пронајден на бродот потпаѓа под секторските санкции на ЕУ, чиј увоз е забранет. „Увозот на таква санкционирана стока во ЕУ е забранет со регулативите за санкции на ЕУ“, соопшти царината. Товарот е запленет до понатамошно известување, а започната е прелиминарна истрага за евентуално кршење на санкциите.
Полицијата го истражува инцидентот како сериозно кривично дело. „Фитбург“ плови под знамето на Свети Винсент и Гренадини, а екипажот го сочинуваат државјани на Русија, Грузија, Азербејџан и Казахстан.
Двајца членови на екипажот беа уапсени во четврток, додека на двајца други им беа издадени забрани за патување, но полицијата не ги откри нивните националности или улоги на бродот.