Астронаутите од мисијата Артемис два успешно ја напуштија Земјината орбита и официјално се на пат кон Месечината, во историски чекор за современата вселенска програма.
Овој клучен момент се случи по изведувањето на таканаречениот „транс-лунарен маневар“ – моќно палење на моторите на вселенското летало „Орион“, со кое екипажот доби доволна брзина за да се ослободи од гравитацијата на Земјата и да продолжи кон длабоката вселена.
Со тоа, астронаутите влегоа во т.н. цислунарен простор – регионот меѓу Земјата и Месечината – што претставува прво човечко напуштање на Земјината орбита по повеќе од 50 години, уште од мисиите на „Аполо“.
Мисијата, која трае околу 10 дена, има за цел да го тестира леталото и системите за поддршка на живот во услови на длабока вселена, како подготовка за идни мисии со слетување на Месечината. Астронаутите ќе направат обиколка околу Месечината и потоа ќе се вратат на Земјата по т.н. „слободно враќање“ траекторија.
Ова патување се смета за пресвртница во новата ера на истражување на вселената, со која NASA повторно го отвора патот за човечко присуство на Месечината, а во иднина и за мисии кон Марс.