Мотоциклистот и каскадер од САД Алекс Харвил загинал вчера додека вежбал за да го урне гинисовиот рекорд за најдолг скок со мотоцикл, јавија медиумите. Тој имал 28 години.
Властите од округот Грант во државата Вашингтон, каде се случи несреќата, велат дека денеска треба да биде извршена обдукција врз телото на Харвил.
Тој планирал да го собори светскиот рекорд од скокот на Австралиецот Роби Медисон од 2008, кој изнесува 106 метри. Официјалниот обид за соборување на рекордот исто така бил закажан за вчера, по вежбата кобна за моторџијата.
Харвил бил оженет и татко на две деца, од кои помладото се родило минатиот месец. Тој еднаш веќе бил гинисов рекордер во скок со мотоцикл во далечина, а рекордот го поставил во 2013 година.