Американската војска изврши нов напад врз брод за кој тврди дека превезувал дрога во крајбрежните води на Латинска Америка, при што загинаа четири лица. Нападот во источниот Пацифик го наредил американскиот министер за одбрана Пит Хегсет, објави Јужната команда на САД на социјалните мрежи, споделувајќи видео од нападот.
On Dec. 4, at the direction of @SecWar Pete Hegseth, Joint Task Force Southern Spear conducted a lethal kinetic strike on a vessel in international waters operated by a Designated Terrorist Organization. Intelligence confirmed that the vessel was carrying illicit narcotics and… pic.twitter.com/pqksvxM3HP
— U.S. Southern Command (@Southcom) December 4, 2025
– Разузнавањето потврди дека бродот превезувал наркотици и се движел по позната рута за шверц во источниот Пацифик. Четири мажи, наркотерористи кои биле на бродот, се убиени, објави Јужната команда, која е одговорна за американските воени операции во Карипското Море и водите покрај Централна и Јужна Америка.
Од почетокот на септември, американската војска изврши најмалку 22 напади врз бродови во источниот Пацифик и Карибите за кои администрацијата на американскиот претседател Доналд Трамп тврди дека шверцуваат дрога. Досега, најмалку 87 лица се убиени во овие напади. Вчерашниот напад беше првиот јавно познат напад од 15 ноември.
Нападите врз бродовите се дел од поширока кампања на Белата куќа за притисок врз режимот на венецуелскиот лидер Николас Мадуро. Хегсет ја нарече пошироката операција против шверцот Операција Јужно Копје.
Трамп ги оправдува нападите врз бродови за дрога тврдејќи дека САД се во „вооружен конфликт“ со нарко-картелите и дека бродовите се контролирани од странски терористички организации.
Најновиот напад доаѓа откако Хегсет се најде во центарот на вниманието по неодамнешниот извештај на „Вашингтон пост“ за нападот на 2 септември во Карибите во кој загинаа 11 лица. Според тој извештај, американската војска го погодила бродот со две ракети, што го потврди и Белата куќа.
Извор запознаен со случајот за „Си-Би-Ес њуз“ изјавил дека вториот напад бил извршен додека две лица, кои го преживеале првиот напад, се обидувале да се искачат назад на бродот. Според тој извор, преживеаните наводно се обидувале да спасат дел од наркотиците. Некои пратеници се прашуваат дали вториот напад претставува воено злосторство.
Хегсет негираше дека го наредил вториот напад, велејќи дека одлуката ја донел адмиралот на морнарицата Френк „Мич“ Бредли. „Вашингтон пост“ објави дека Хегсет рекол дека „сите на бродот треба да бидат убиени“, тврдење што тој и Бредли го негираа.
Вчера, членовите на Конгресот одржаа седница зад затворени врати каде што им беше прикажано видео од вториот удар, а за инцидентот беа информирани од Бредли и генералот Ден Кејн, претседател на Здружениот штаб на вооружените сили.
По гледањето на видеото, претставникот Џим Хајмс, демократ од Конектикат, врвен демократ во Комитетот за разузнавање на Претставничкиот дом, го нарече „едно од највознемирувачките нешта што сум ги видел во јавната служба“. Во исто време, сенаторот Том Котон, републиканец од Арканзас, републиканец и претседател на Комитетот за разузнавање на Сенатот, рече дека „не видел ништо вознемирувачко“.