Организацијата на Обединетите нации за образование, наука и култура ја повика италијанската влада да „обезбеди најголема посветеност“ за решавање на „долгогодишните проблеми“ во Венеција, која со години се бори со премногу туристи и ефектите од климатските промени.
Венеција е едно од 1.157 места во моментов прогласени за светско наследство, со „извонредна универзална вредност“ поради својата културна или природна понуда.
Препораката Венеција да се стави на листата на загрозено светско наследство ја дадоа УНЕСКО и експертите на советодавното тело во пресрет на 45. седница на Комитетот за светско наследство на оваа агенција, што треба да се одржи во Ријад во септември. Нацрт-резолуцијата тврди дека „нема значаен напредок во решавањето на постојаните и сложени прашања особено поврзани со масовниот туризам, развојните проекти и климатските промени“.
Во нацрт-резолуцијата се наведува дека овие проблеми предизвикуваат „влошување и оштетување на градежните конструкции и урбаните средини, деградација на културниот и социјалниот идентитет на објектот и загрозување на интегритетот на неговите културни, еколошки и пејзажни атрибути и вредности“.
Венеција во последните години се справува со бројни временски проблеми. Во февруари годинава градот го зафати суша која беше толку силна што беше невозможно гондоли, водени такси и амбулантни возила да минуваат низ некои канали. Во ноември 2019 година, поплавите беа толку големи што беа загрозени историските богатства и градбите.
Прекумерниот туризам во Венеција е постојана тема, а УНЕСКО забележа некои од напорите направени за борба против него, како што е забраната за големи бродови да влегуваат во басенот Сан Марко – каналот Џудекка. Сепак, во извештајот се наведува дека „ефектите од континуираното влошување поради човечка интервенција, вклучително и континуираниот развој, влијанијата од климатските промени и масовниот туризам, се закануваат да предизвикаат неповратни промени на извонредните универзални вредности“ на Венеција.
Според извештајот на SkyTG24, општината Венеција соопшти дека „внимателно ќе ја прочита предложената одлука објавена од Комитетот за светско наследство на УНЕСКО и ќе размени мислења со владата, со која УНЕСКО соработува“.