Украина транспортираше околу 11,36 милиони тони руска нафта преку јужниот крак на нафтоводот Дружба во 2024 година, што значи дека обемот на транзит е намален за 16 отсто во споредба со 2023 година и е најнизок од 2014 година, објави денеска украинскиот весник Екпро.
Испораките на руска нафта во Унгарија беа најголеми, со повеќе од 4,7 милиони тони, што е речиси рамно на годишно ниво, пренесе Тас.
Во Словачка се транспортирани 3,9 милиони тони нафта, што е за 15 отсто помалку од претходната година, а во Чешка за 2,7 милиони тони (35 отсто помалку).
Според проценките на весникот ЕкПро, Украина минатата година добила речиси 10 милијарди гривни (245 милиони евра) за транзит на нафта од Русија.
Просечниот дневен волумен во првата недела од јануари изнесувал околу 34.900 метрички тони, или 14 отсто повеќе отколку во декември, објави украинскиот весник.