Русија веќе ги постави приоритетите за летно-есенската кампања во конфликтот во Украина и нема планови да ги намали воените операции, потврдија денес неколку извори од украинските одбранбени сили.
РБК Украина објави, повикувајќи се на извори во украинската војска, дека рускиот претседател Владимир Путин одлучил да ја продолжи офанзивата оваа година, објави денес украинската агенција „Униан“.
Според украинските медиуми, Русија планира да регрутира приближно 343.000 луѓе за договорна служба оваа година, а се проценува дека ова регрутирање ќе ѝ овозможи на Русија да го одржи сегашниот интензитет на воените операции во Украина, барем до крајот на годината.
Украинската војска проценува дека Русија, за време на летно-есенската офанзивна кампања, планира да ги концентрира своите главни напори на заземање на целата територија на регионите Луганск и Донецк во рамките на нивните административни граници и на формирање таканаречена тампон зона длабока 15-20 километри, првенствено во Сумскиот и Харковскиот регион.
Еден од соговорниците од украинската војска прецизираше дека, во случај на успех во овие области, Русија планира офанзивни акции со цел освојување на нови територии во Запорошката и Херсонската област.
Извори од украинската војска проценија дека Русија нема да може значително да ги зајакне своите позиции на бојното поле за време на летната и есенската кампања и дека е нереално да се достигнат административните граници на Донецката, Запорошката и Херсонската област до крајот на ова лето или дури и до крајот на годината, или целосно да се окупира една од нив.