Италијанската полиција со поддршка од Европол на 1 октомври во Сицилија го лоцирала и уапсила осомничениот В.М., еден од најбараните бегалци во Италија, соопшти денеска Европол.
Опасниот бегалец, син на еден од членовите на „Коза ностра“, италијанските власти го барале од 2016 година поради учество во тројно убиство извршено во 2006 година на северот од Италија.
„Европол“ се вклучил во случајот бидејќи криминалецот имал меѓународни врски со други земји во ЕУ и други држави.
Апсењето е резултат на успешна размена на информации меѓу Европол, Италија и другите земји членки на ЕУ и е петти таков случај во рамките на италијанскиот проект „Европотрага“, чија цел е лоцирање и апсење на опасните бегалци од мафијата во Европа.
Четири слични операции на 7 мај, 12 мај, 28 јули и на 18 август беа извршени од италијанската полиција, во соработка со полицијата од земјите членки на ЕУ и Европол, при што беа уапсени тројца бегалци, припадници на „Коза ностра“ и еден бегалец припадник на „Ндрангета“.