Полскиот премиер Доналд Туск денес изјави дека упадот на руски беспилотни летала во воздушниот простор на неговата земја не бил грешка.
„И ние би сакале нападот со беспилотни летала врз Полска да биде грешка. Но, не беше. И го знаеме тоа“, рече Туск во објава на социјалната мрежа X.
Коментарот на Туск дојде како одговор на изјавата на претседателот на Соединетите Американски Држави, Доналд Трамп, дека упадот на руски беспилотни летала во Полска можеби бил грешка.
„Можеше да биде грешка, но без оглед на тоа, не сум среќен за ништо што има врска со целата оваа ситуација. Се надевам дека ќе заврши“, им рече Трамп на новинарите во Белата куќа.
Полска побара од сојузниците дополнителни системи за воздушна одбрана и технологија против беспилотни летала за подобро да се заштити од руски упади по инцидентот претходно оваа недела во кој беспилотните летала што влегоа на нејзина територија од Украина и Белорусија беа соборени од силите на НАТО.