Турција понуди нов нацрт-договор со кој би се замрзнала војната меѓу Русија и Украина по постојната линија на фронтот, а според извор запознаен со документот, тој се промовира со посредство на турскиот претседател Реџеп Ердоган и е иницијатива на турска страна.
Изворот тврди дека сите три страни, имено Турција, Русија и Украина, во моментов го имаат текстот на документот, пренесува рускиот независен весник „Нова газета“, со седиште во Летонија.
Нацртот се базира на документите од првите преговори во Истанбул, а дел од формулациите од мај 2022 година се вклучени во новиот текст.
Мировната иницијатива може да ја поддржат голем број европски политичари, како и земјите од глобалниот југ, се наведува во текстот.
Во документот се забележува дека е заедничка обврска на Соединетите Американски Држави и Русија да не користат нуклеарно оружје под никакви околности и повикува на обновување на Договорот за ограничување на стратешкото оружје (СТАРТ-3), во отсуство на еднострано повлекување од него во иднина.