Јапонскиот национален нуклеарен регулатор соопшти дека три светли објекти за кои се верува дека се дронови летале во нуклеарниот комплекс Генкаи на југозападот од земјата.
Во соопштението се вели дека националниот нуклеарен регулатор бил известен за инцидентот од „Кјушу Електрик Пауер“, кој управува со нуклеарната централа Генкаи со четири реактори, објави новинската агенција Кјодо.
Регулаторот соопшти дека не се откриени абнормалности откако инцидентот бил пријавен околу 21 часот синоќа и дека нема ризик за околното подрачје. Летовите на дронови над и во близина на нуклеарните централи се генерално забранети, а службено лице на регулаторот го опиша инцидентот како „исклучително необичен“.
Локалните власти соопштија дека немало абнормалности во нивото на зрачење околу комплексот по инцидентот и дека на жителите не им било кажано да се евакуираат.
