Полицијата во руската Чеченска Република денеска отвори истрага против три жени заради тоа што, наводно, измамиле џихадисти од Исламска држава.
Портпаролот на регионалната полиција, Магомед Денијев, изјави дека жените, наводно, отворале налози на социјалните мрежи за да контактираат со ИД, а потоа на џихадистите им зборувале дека немаат пари да отпатуваат во Сирија, пренесе Танјуг.
Откако ќе ги примиле парите за пат, тие ги гаснеле налозите на социјалните мрежи, објави весникот „Росискаја газета“.
Денијев тврди дека две жени со измама оствариле корист од 200.000 рубљи (околу 3.300 долари), но, додаде, дека е малку веројатно дека тие ќе бидат казнети за измама бидејќи за тоа треба ИД да им поднесе тужба.
Според податоците на руските власти, кон Исламска држава до сега се придружиле повеќе од 1.000 руски државјани.