Американскиот претседател Доналд Трамп се огласи за разговорите што неговиот специјален претставник ги одржа во Москва со рускиот претседател Владимир Путин.
Трамп го опиша нивниот состанок како „многу продуктивен“, велејќи дека е постигнат „голем напредок“.
„Мојот специјален претставник, Стив Виткоф, штотуку имаше многу продуктивен состанок со рускиот претседател Владимир Путин. Постигнат е голем напредок! После тоа, ги информирав некои од нашите европски сојузници. Сите се согласуваат дека оваа војна мора да заврши и дека ќе работиме на тоа во деновите и неделите што доаѓаат. Ви благодарам за вашето внимание по ова прашање!“, напиша Трамп на социјалната мрежа TruthSocial.
Средбата на американскиот пратеник Стив Виткоф со рускиот претседател Владимир Путин во Москва во среда помина добро, изјави функционер на Белата куќа, но Вашингтон сè уште планира да продолжи со таканаречените „секундарни“ санкции во петок.
„Русите се желни да продолжат да соработуваат со САД. Се очекува секундарните санкции да бидат спроведени во петок“, рече функционерот на Белата куќа.
САД планираат да воведат санкции врз купувачите на руска нафта.
Трамп, исто така, се закани со дополнителни царини за руски стоки доколку не се преземат чекори за прекин на војната во Украина.
Да потсетиме дека рускиот претседател Владимир Путин и специјалниот претставник на американскиот претседател Трамп, Стив Виткоф, денес разговараа во Кремљ три часа, а помошникот на Путин, Јуриј Ушаков, ги откри деталите од состанокот. Како што рече, главната тема беше украинската криза.
„Ако зборуваме за теми, тогаш, пред сè, секако, тоа е украинската криза. А втората тема се перспективите за можен развој на стратешка соработка меѓу САД и Русија“, рече Ушаков.
Ушаков рече дека разговорот бил корисен и конструктивен.