Американскиот претседател Доналд Трамп се огласи набргу откако Кина објави дека ќе воведе дополнителни царини за стоки од САД.
„Ова е одлично време да го преместите вашиот БИЗНИС во Соединетите Американски Држави, како што тоа го прават Apple и многу други, во рекорден број. НУЛА ТАРИФИ и речиси моментални електрични/енергетски врски и одобренија. Без одложувања. НЕ ЧЕКАЈТЕ“, напиша Трамп на Truth Social.
Кина најави дека ќе ги оданочува американските стоки со стапка од 84 отсто, што претставува зголемување за 50 отсто во однос на претходните кинески царини.
Одлуката доаѓа откако Америка воведе дополнителни 50 отсто царини за кинески стоки претходно оваа недела. Ова уследи по две претходни мерки од 34 проценти и 20 проценти, така што вкупната американска царина за кинескиот извоз од утринава изнесува 104 проценти.
Трамп постојано изјавува дека сака да го врати производството во САД.