Американскиот претседател Доналд Трамп му предложил на украинскиот претседател Володимир Зеленски да отпатува во Москва на средба со рускиот претседател Владимир Путин, објави „Блумберг“, повикувајќи се на извори запознаени со разговорот.
Канцеларијата на претседателот на Украина набргу потоа негираше дека таков предлог бил упатен.
Според изворите на агенцијата, Трамп го изнесе предлогот за време на средбата со Зеленски на маргините на Генералното собрание на Обединетите нации во Њујорк.
Зеленски, според истите извори, го одбил предлогот, а извори блиски до украинскиот претседател наведоа дека особено го вознемирило тоа што Трамп му предложил да отпатува во Москва.
Канцеларијата на украинскиот претседател, сепак, негираше дека Трамп му предложил на Зеленски да отпатува во Москва, објави новинарот на „Фајненшел тајмс“, Кристофер Милер.
Според изворите на кои се повикува Милер, Трамп и Зеленски разговарале за можноста за одржување трилатерални преговори, но Трамп не му предложил на Зеленски да отпатува во Москва на средба со Путин.
Кремљ во повеќе наврати соопшти дека средба меѓу Путин и Зеленски би можела да се одржи во Москва.
Портпаролот на рускиот претседател, Дмитриј Песков, на 23 септември рече дека ставот на Москва е познат и дека Зеленски може да дојде во Москва доколку сака, со безбедносни гаранции.
На маргините на Генералното собрание на ОН во Њујорк, дописник на руската државна телевизија се обиде да го праша Зеленски кога ќе ја посети Москва.
Зеленски првично го игнорираше, но на крајот, без да се сврти кон новинарот, одговори: „Со ракета“.