Американскиот претседател Доналд Трамп денес изјави дека САД би можеле „лесно“ да го отворат Ормутскиот теснец, што, како што рече, би можело да донесе значителни економски придобивки.
„Со малку повеќе време, лесно можеме да го отвориме Ормутскиот теснец, да ја земеме нафтата и да се збогатиме. Тоа би било голема добивка за светот“, напиша Трамп на платформата Truth Social.
Околу една петтина од светската сурова нафта и течен природен гас обично се транспортира преку Ормутскиот теснец.
Сепак, од почетокот на војната со Иран на крајот на февруари, превозот низ теснецот е претежно запрен, а блокадата доведе до нагло зголемување на цените на нафтата.
Во моментов, само неколку бродови минуваат низ теснецот секој ден, главно од Иран, Обединетите Арапски Емирати, Индија, Кина и Саудиска Арабија.
Од почетокот на март низ теснецот поминале 225 товарни бродови, што е за 93 проценти помалку во споредба со периодот пред војната.