Кандидатот на Републиканската партија на американските избори, Доналд Трамп, денеска изјави дека земјите како Русија, Кина и Северна Кореја ќе престанат да бидат непријатели на Соединетите Американски Држави доколку имаат паметен претседател.
– Имаме непријатели надвор од границите на нашата земја: Кина, Русија, Северна Кореја. Но, тие не се вистински непријатели. Ако имате паметен претседател, тогаш тие не ви се непријатели. Можете да ги направите одлични, им рекол Трамп на своите поддржувачи, пренесува Newsmax.
Говорејќи на предизборниот митинг во Вирџинија по првата претседателска дебата, Трамп го исмеваше актуелниот претседател Џо Бајден за неговата „ментална неспособност“.
„Здраво Вирџинија: Дали некој гледаше нешто наречено дебата синоќа? Како што видовте синоќа, победивме човек кој навистина сака да ја уништи нашата земја. Тој (Бајден) е најкорумпираниот, најнеспособниот претседател во историјата на нашата земја“, рече Трамп.