Генералниот секретар на НАТО, Марк Руте, изјави дека „воопшто не е вознемирен“ од ласкавата порака на американскиот претседател Доналд Трамп пред самитот на НАТО во Хаг, велејќи дека „стои зад сè што напишал“.
„Во таа порака напишав фактички изјави и немам проблем Трамп да ја објави“, им рече Руте на новинарите на почетокот на самитот денеска. На прашањето на новинарите дали се чувствува засрамен од тоа, тој одговори: „Апсолутно не“.
Трамп ја објави пораката на својата социјална мрежа Truth Social вчера за време на летот за Европа. Во неа, Руте му честиташе за притисокот што го извршил врз европските членки да ги зголемат трошоците за одбрана.
„Ќе успеете во нешто што ниту еден американски претседател не успеал со децении. Европа конечно ќе почне да плаќа – како што треба – и тоа ќе биде ваша победа“, му напиша Руте на Трамп, додавајќи дека му посакува безбеден пат до Хаг.
И покрај очигледниот неуспех на Трамп експлицитно да ја потврди својата посветеност на Член 5 од договорот за НАТО – кој гарантира колективна одбрана во случај на напад врз која било членка – Руте денес изјави дека не гледа проблем.
„Апсолутно ми е јасно дека Соединетите Американски Држави се целосно посветени на НАТО и на Член 5. Исто така е јасно дека од Канаѓаните и Европејците се очекува – и ќе се очекува денес – да го забрзаат зголемувањето на нивните трошоци за одбрана“, рече тој.
Трамп, кој ги критикуваше членките на НАТО од почетокот на својот мандат за она што го смета за премал придонес во заедничкиот буџет, го користи самитот за дополнителен притисок врз сојузниците. Руте, кој неодамна ја презеде функцијата шеф на алијансата, се обидува и да го смири Трамп и да го зачува единството во рамките на НАТО.