Американскиот потпретседател Џеј Ди Венс и началникот на Здружениот генералштаб, генерал Ден Кејн, предупредиле на можноста од ескалација на војната со Иран за време на состанокот што претседателот Доналд Трамп го одржал во петокот во Белата куќа.
Во исто време, САД, според информациите на CNN, привремено ја запреле кампањата на бомбардирање на Иран по речиси две недели непрекинати ноќни напади. Информацијата ја потврдиле извор запознаен со ситуацијата и американски функционер.
Воените операции моментално се „ставени на пауза“, потврдил извор од американското Министерство за одбрана.
Генералот Кејн на состанокот особено го истакнал проблемот со американските залихи на муниција и предупредил на други можни негативни последици доколку конфликтот продолжи.
Според еден од изворите, Кејн му рекол на Трамп дека армијата може да ги спроведе достапните воени опции, но истовремено предупредил и на последиците од таков потег. Прашањето за залихите било само едно од повеќето предупредувања што претседателот ги добил на состанокот.
Засега не е јасно дали токму овие предупредувања се главната причина за прекинот на нападите, ниту дали паузата ќе продолжи.
„Претседателот Трамп постојано повторува дека предност му дава на дипломатското решение, но сите опции остануваат отворени доколку Иран продолжи со терористички активности во Ормускиот Теснец или против нашите сојузници“, изјави директорот за комуникации на Белата куќа, Стивен Чеунг.
„По успешните санкции кои силно ја погодија иранската економија и по 13 дена напади врз воени цели како одговор на нивната агресија, Иран би постапил мудро доколку работи на договор. Во спротивно, знае што следува“, додаде тој.
Трамп во петокот, по состанокот со членовите на кабинетот, потврди дека американските претставници активно преговараат со Иран.
Сепак, тој додаде дека американската војска би можела да ги продолжи нападите или дури и да го засили нивниот интензитет. Истовремено оцени дека Иран сега „посериозно“ пристапува кон преговорите.
Според еден од изворите, администрацијата на Трамп и во петокот попладне разгледувала можни сценарија за ескалација на конфликтот. Земјите од Персискиот Залив ги повикале американските претставници на воздржаност, но истовремено признале дека САД располагаат со единствени капацитети за дополнително заострување на конфликтот доколку се одлучат на таков чекор.
Во меѓувреме, клучните американски залихи на оружје веќе се значително намалени и би можеле дополнително да се исцрпат доколку нападите врз Иран продолжат.
Иако Трамп јавно зборувал за можноста од масовен напад, приватно на своите преговарачи им порачал да продолжат со разговорите.
Ова, според CNN, укажува на ограничувањата со кои се соочуваат САД при воени операции што не вклучуваат копнени сили.
Според повеќе извори, малкумина во најтесниот круг на Трамп или во Пентагон веруваат дека ограничените воени операции би ги донеле посакуваните резултати.
Кејн и други високи воени команданти уште пред почетокот на конфликтот го предупредувале Трамп дека долготрајна воена кампања може сериозно да ги исцрпи американските залихи на оружје.
„Американската војска е најмоќната во светот и располага со сè што е потребно за дејствување во време и на место што ќе го избере претседателот“, изјави портпаролот на Пентагон, Шон Парнел.
„Успешно спроведовме бројни операции низ светот, а истовремено обезбедивме вооружените сили да располагаат со огромен арсенал за заштита на нашиот народ и националните интереси“, додаде тој.