Тексас е првата американска држава во која бројот на заразени со коронавирус надмина еден милион.
Во целата земја, веќе три пати за помалку од една недела се потврдени над 100.000 нови случаи на ден, пренесува „Ројтерс“.
Да беше посебна држава, Тексас ќе беше рангиран на десеттото место во светот по вкупниот број на луѓе кои заболеле од Ковид-19. Оваа сојузна американска држава држи над десет проценти од вкупниот број случаи на коронавирус во САД.
Според статистиката на „Ројтерс“, просечниот дневен број на нови инфекции во Тексас минатата недела бил околу 8.000, што е најголем во САД во споменатиот период, по што следи Илиноис со двојно помалку пријавени нови случаи на ден.
САД се најтешко погодени од пандемијата во светот, со над 9,9 милиони потврдени случаи и повеќе од 235.000 починати.