Католичките лидери од целиот свет упатија заеднички апел до претстојната конференција на Обединетите нации за климатски промени со барање да се усвои „праведна, правно обврзувачка и вистински трансформирачка спогодба“, која ќе ги одреди границите на глобалните температури и целите на ограничување на емисијата на штетни гасови.
Католичките кардинали и епископи од целиот свет го потпишаа овој апел во Ватикан.
Тие изјавија дека климатските промени треба да бидат поврзани со социјалната неправда и социјалното маргинализирање на најсиромашните и најранливите категории на граѓани.
Документот, кој содржи десет точки е заснован на папска енциклика од јуни, во која папата Франциско побара итно да се преземат мерки за спасување на планетата од глобалното затоплување.
Конференцијата за климата на ОН ќе се одржи во Париз од 30 ноември до 11 декември.