Околу 200 патници на брод во водите на Нов Зеланд се заразиле од стомачен вирус, соопштија здравствените власти во Велингтон.
Болните биле веднаш изолирани во своите кабини на бродот „Дон Принсес“, каде ќе останат се додека не се процени дека повеќе не се заразни. Вирусот предизвикува болки во стомакот, вртоглавица, повраќање и дијареа, а трае најмногу три дена.
Екипажот веднаш го дезинфицирал бродот, а на останатите патници им препорачале да ги мијат често рацете и да користат дезинфекциски средства.
На бродот се наоѓале 1.500 патници, кои денеска требале да тргнат за Австралија, завршувајќи го своето 13-дневно крстарење.
Сличен инцидент се случил на истиот брод пред две години, кога 125 патници се разболеле за време на патувањето во Аљаска.