Стотици илјади луѓе во австралиската држава Квинсленд денеска останаа без струја откако тропската бура Алфред, иако слабее, донесе силни ветрови, обилни врнежи и предупредувања за поплави во областа.
Според соопштението на австралиската компанија за дистрибуција на електрична енергија Енергекс, околу 316.540 луѓе во југоисточен Квинсленд останале без струја, а градот Голд Коуст е најпогодената област со повеќе од 112.000 луѓе без струја, пренесува Ројтерс.
Невремето стигна до брегот на Квинсленд во саботата како „тропска бура со низок интензитет“. Најсилните удари на невремето го заобиколија главниот град на Квинсленд, но бурата ја почувствуваа жителите на јужниот дел на државата и Нов Јужен Велс.
Австралискиот премиер Ентони Албанес денеска изјави дека „ситуацијата во Квинсленд и северниот дел на Нов Јужен Велс останува многу сериозна поради поплавите и силните ветрови“.
