Војниците во Судан денеска извршиле претрес во штабот на Исламското движење на суданскиот претседател Омар ел Башир во Картум, јавија некои светски агенции.
Исламското движење е главна сила на владејачката партија, а извори од Владата навеле дека Башир поднел оставка и оти во тек се консултации за формирање преодна Влада.
Според други агенции, не е јасно каде се наоѓа Башир во моментов и што точно се случува, како и дека двајца високи функционери рекле дека армијата моментално разгледува како да формира преодна Влада.
Според трети извори, суданскиот претседател отстапил од должноста и во тек се консултации за формирање приоден воен совет кој ќе ја води земјата, рекле владини извори и покраински министер.
Министерот за производство и економски ресурси во Северен Дарфур Адел Маџуб Хусеин за телевизиската мрежа Ал Хадат со седиште во Дубаи изјавил дека се водат „консултации за формирање воен совет кој ќе ја преземе власта откако претседателот Башир отстапил од должноста“.
Во исто време сведоци изјавиле дека војската во Картум ги зазела сите важни места од раните утрински часови, а на улиците се паркирани оклопни возила и тенкови.
Вооружените сили на Судан претходно соопштија дека наскоро ќе издадат важно соопштение во врска со случувањата во Картум и шпекулациите во јавноста дека е извршен воен преврат во кој е уапсен претседателот на земјата Омар ел Башир.
– Вооружените сили наскоро ќе издадат важно соопштение, објави државната телевизија.
Веста следува по повеќемесечни протести во земјата.
Пред Министерството за одбрана се собрани повеќе граѓани кои извикуваат „Падна, победивме“.
Башир на власт дојде во 1989 година после преврат, а четири години подоцна САД него и неговата Влада ги ставија на список на спонзори на терористи и воведоа санкции.
Башир е обвинет и пред Меѓународниот суд во Хаг поради наводи дека извршил геноцид во Дарфур за време на бунтот во покраината во 2003 година.
Последната криза во земјата се случи минатиот викенд кога граѓаните почнаа протест пред Министерството за одбрана каде се наоѓа и резиденцијата на Башир, а во судирите кои избувнаа пред два дена меѓу демонстрантите и армијата, убиени се 11 лица.