Силите на сирискиот режим можеби го извршиле хемискиот напад во близина на Дамаск, без лична дозвола од претседателот Башар ал Асад, објави денеска германскиот весник „Билд“, повикувајќи се на извори во германските разузнавачки служби.
Сириските воени команданти барале од претседателската палата да им дозволи употреба на хемиско оружје изминатите четири и пол месеци, се вели во радио пораките, кои ги пресретнале германските агенти, но дозволата секој пат им била ускратена, додава весникот.
Тоа, пишува „Билд“, би можело да значи дека Асад можеби не е лично одговорен за нападот во близина на Дамаск од 21 август во кој според проценките на Вашингтон загинале над 1.400 лица.
Германската разузнавачка служба (БНД) не била достапна за коментар за овие тврдења, додава „Билд“.