Шефот на германската дипломатија, Франк-Валтер Штајнмајер, изјави дека републиканскиот кандидат за претседател на САД, Доналд Трамп, е закана за американската и за светската безбедност поради својата „политика на страв и на изолација“.
Штајнмајер посочи дека е загрижен поради, како што рече, двосмислените ветувања на Трамп. Тој ги посочува ветувањата на републиканецот дека „Америка повторно ќе ја направи силна“, како и најавата за намалување на бројот на војниците стационирани во странство.
– Тоа е контрадикторно и ме загрижува. Политиката на страв и на изолација ќе донесе помалку, а не повеќе безбедност и ќе биде опасна не само за САД, туку и за Европа, како и за остатокот од светот – рече Штајнмајер, кој наскоро ќе отпатува во Вашингтон на средба на министрите за надворешни работи и за одбрана, посветена на борбата против Исламска држава.
Штајнмајер веќе со месеци го критикува Трамп поради неговиот говор „Прво Америка“, но дава пофални зборови за кандидатот на демократите, Хилари Клинтон, нарекувајќи ја искусен експерт за надворешна политика.