Украина очекува во првата половина на оваа година официјално да бидат отворени преговарачките кластери за пристапување на земјата во Европската унија, изјави денеска украинскиот премиер Денис Шмихал.
„Веќе го завршивме билатералниот скрининг во рамките на трите преговарачки кластери поврзани со внатрешниот пазар и надворешните односи. Очекуваме овие преговарачки кластери официјално да бидат отворени во наредните месеци. Всушност, се надевам дека тоа ќе се случи во првата половина на оваа година“, нагласи тој за време на форумот „Членство на Украина во ЕУ: не ако, но кога“, известува Ukrinform.
Според него, Украина постигнала значителен напредок во изминатите три години, од моментот кога ја поднесе својата апликација за членство во ЕУ до почетокот на пристапните преговори, што во моментов, како што наведе, е „најважниот приоритет“.