Јапонските власти го осудија на смрт шефот на мафијашката организација „Кудо-каи“ – 74-годишниот Сатору Номура, за нарачување убиство и напади врз три лица меѓу 1998 и 2014 година.
Јапонецот ги отфрли обвиненијата, но Окружниот суд на Фукуока ги прифати аргументите против него. За многумина, ваквата пресуда е своевидно изненадување, оти немало докази што директно ќе го поврзат Номура со нападите.
– Побарав фер судење… Ќе жалите за оваа одлука до крајот на животот, рече Номура пред судијата.
Номура е осуден затоа што, според пресудата, во 1998 година наредил убиство на поранешен влијателен шеф на риболовно здружение. Исто така, му се судеше за напад врз роднина на жртвата на убиството, од 2014 година и напад на медицинска сестра во клиниката каде што Номура се лекувал, објавија јапонските медиуми.
Номура беше обвинет и за напад од 2014 година, врз полицаец кој ја истражувал неговата мафијашка организација. Полицаецот преживеал, но се здобил со сериозни повреди. Обвинителите тврдеа дека сите напади биле извршени од организацијата Кудо-каи на чело со Номура.
Јапонија е една од земјите каде што сѐ уште важи смртната казна. Јавната поддршка за смртната казна во Јапонија останува висока и покрај критиките од меѓународната заедница и групите за човекови права.