Не ни фалат беспилотни авиони на Блискиот исток и покрај тврдењата на Иран дека заплениле американски разузнавачки авион, изјави порпаролот на Петата американска флота, стационирана во Бахреин, цитиран од американските медиуми.
Иранската државна телевизија денеска соопшти дека иранските револуционерни Гардисти фатиле американски беспилотен авион, што навлегол во иранскиот воздушен простор во реонот на Персискиот залив.
Според портпаролот Џејсон Салета, сите американски беспилотни авиони во регионот „се на број“. Тој под сомнение го стави иранското тврдење дека авионот „СканИгл“ го нарушил воздушниот простор на Иран, подвлекувајќи дека американските операции во Заливот се извршуваат „во граници на меѓународно признатиот воден и воздушен простор“.
Портпаролот посочи дека во минатото авиони од овој тип исчезнувале во морето, но во последно време немало такив тип инциденти.
И други земји во регионот на Заливот, вклучувајќи ги и Обединетите арапски емирати, располагаат со беспилотни авиони „СканИгл“, потсетуваат американските медиуми.