САД му најавија на Советот за безбедност на Обединетите нации дека в понеделник планираат да свикаат седница за гласање на нацрт-резолуцијата за воведување дополнителни санкции против Северна Кореја поради нејзината нуклеарна и ракетна програма.
Според резолуцијата САД сакаат од СБ да воведе нафтено ембарго кон Северна Кореја, да се забранат извозот на текстил и наемот на севернокорејски работници во странство, а исто така да се замрзнат сметките на севернокорејскиот лидер Ким Џонг-ун и да му се воведе забрана за патување.
Не е познато како ќе гласаат севернокорејскиот сојузници Кина и Русија, но висок американски службеник изрази сомневање дека овие две земји би усвоиле построги мерки од забраната на извоз на севернокорејски текстил.
Кинески претставници изразуваат стравувања дека воведувањето нафтено ембарго може да предизвика голема нестабилност во Северна Кореја.
Резолуцијата за да биде усвоена треба да добие поддршка од девет од 15-те членови на Советот и никој од постојаните членови, Велика Британија, САД, Франција, Русија и Кина да не стави вето.