Посмртните останки на речиси 400 американски морнари и маринци загинати во нападите на Перл Харбор ќе бидат ексхумирани, за да можат да бидат идентификувани и потоа одделно погребани, соопшти денеска Пентагон.
Загинатите морнари и маринци се наоѓале на воениот брод „УС С Оклахома“ кога во 1941 година бил погоден од јапонско торпедо, а нивните тела се закопани во заедничка гробница на Хаваи.
Досега се идентификувани само 35 од вкупно 429 морнари и маринци, кои загинале во јапонскиот напад на бродот „Оклахома“, а новите напори за идентификација значајно ќе придонесат за напредокот остварен на полето на форензичарската наука и ДНК анализата, сооппти американското Министерство за одбрана.
Воениот брод „Оклахома“ беше еден од неколкуте американски бродови кои беа мета на јапонските подморници и бомбардери во ненадејниот напад на 7 декември 1941 година, во кој загинаа повеќе од 2.400 луѓе.