Соединетите Американски Држави воведуваат забрана за увоз на низа канадски производи, меѓу кои пиво и други алкохолни пијалаци, мотоцикли и одредени млечни производи, во најновата ескалација на трговската војна меѓу Вашингтон и Отава.
Забраната ќе стапи во сила на 29 септември, а одлуката следува откако Канада воведе царини за американски производи како одговор на претходните американски трговски мерки.
Американскиот претседател Доналд Трамп ја обвини Канада за дискриминација на американските компании и производители, додека канадскиот премиер Марк Карни порача дека земјата ќе продолжи да ја намалува економската зависност од својот најголем трговски партнер.
„Секогаш постои цена за дејствувањето. Но, таа не може да се спореди со цената на недејствувањето“, порача Карни.
Забраната опфаќа голем број алкохолни пијалаци, меѓу кои пиво, различни видови вино, виски, бурбон, рум, вотка, вермут, текила, мескал и бренди. Меѓу погодените производи се и мотоцикли, како и дел од млечните производи.
Покрај целосните забрани за увоз, Вашингтон воведува и дополнителни царини. Повеќе видови канадско сирење ќе бидат оптоварени со царина од 50 проценти, а повисоки давачки ќе има и за производи од хартија, алуминиум, дрво, мебел и други стоки.
Новите мерки доаѓаат откако канадските возвратни царини за американска стока во вредност од околу 20 милијарди долари стапија во сила. Тие се движат од 15 до 50 проценти и опфаќаат производи од челик и мебел до облека и електроника.
Иако претставници на двете земји велат дека сакаат да постигнат договор, нови формални преговори засега нема откако последната рунда разговори пропадна кон крајот на август.
Трговскиот спор дополнително ги влоши односите меѓу долгогодишните сојузници и отвори прашања за иднината на трговскиот договор меѓу САД, Мексико и Канада.
Канада годинава пласира речиси 68 проценти од својот вкупен извоз на американскиот пазар, поради што натамошната ескалација на трговскиот конфликт би можела да има значителни последици за канадската економија.