САД бараат либанското шиитско движење Хезболах неодложно да ги повлече борците од сирискиот конфликт и конкретно од судирите за стратешкиот град Кусеир.
– Најостро ја осудуваме изјавата на водачот на Хезболах Хасан Насрала, кој ја потврди активната улога на борците во судирите во Кусеир и во Сирија. Тоа е неприфатлива и исклучително опасна ескалација, изјави портпаролот на Стејт департментот Џенифер Псаки.
Таа истакна дека засега нема решение по прашањето за учество на Иран во меѓународната конференција за Сирија.
– САД сметаат дека Иран не игра конструктивна улога по прашањето за Сирија. Техеран таму испраќа оружје, пари и борци и ја финансира групата Хезболах, додаде Псаки.
Белата куќа соопшти дека претседателот Барак Обама не ја исклучува можноста за наложување зона забранета за летови над Сирија.