Генералниот секретар на НАТО Марк Руте ќе ја повика администрацијата на Доналд Трамп да не ја принудува Украина да прифати мировен договор против нејзината волја, пишува „Фајненшл тајмс“ пред средбата на Руте со клучните членови на тимот на Трамп во Вашингтон.
Повикувајќи се на тројца неименувани функционери, весникот објави дека генералниот секретар на НАТО ќе посочи дека „неправеден“ крај на конфликтот, наводно, ќе го зголеми нивото на закана за Европа од Москва.
„Клучната порака е да бидете сигурни дека Американците разбираат што е во прашање“, изјави еден од изворите за Фајненшл тајмс.
Според написот, Руте закажал средби во Вашингтон со шефот на Пентагон Пит Хегсет, државниот секретар Марко Рубио и американскиот советник за национална безбедност Мајк Волц.
Главната цел на посетата на генералниот секретар на НАТО на главниот град на САД е да се разговара за подготовките за јунскиот самит на алијансата во Хаг.