Судијата на Меѓународниот кривичен суд, Карим Кан, кој ја издаде потерницата за рускиот претседател Владимир Путин, денес е осуден од руски суд на 15 години затвор.
Пресудата е донесена во отсуство на Кан, како и против осум судии на Меѓународниот кривичен суд, кои се осудени во зависност од нивните улоги, во траење од 3,5 до 15 години затвор, според објавата на веб-страницата на Канцеларијата на главниот обвинител на Руската Федерација.
Се наведува дека Кан е осуден на 15 години затвор, при што првите девет години ќе ги отслужи во казнена колонија со максимална безбедност, а во образложението, Канцеларијата напиша дека Кан нелегално ги гонел руските граѓани од февруари до март 2022 година во Хаг.
Рускиот истражен комитет појасни дека меѓу осудените се судиите Томоко Акане, Росарио Салваторе Аитала, Серхио Херардо Угалде Годинез и Хејкел Бен Мафуд, како и претседателот на Хашкиот суд, Пјотр Јозеф Хофмањски, и неговите заменици, Каранца Луз дел Кармен Ибањез, Бертрам Шмит и Рене Аделаида Софи Алапини-Гансу.
„Претседателството на Меѓународниот кривичен суд, без законска основа, им наложи на судиите на коморите да издадат очигледно нелегални налози за апсење. Горенаведениот обвинител и судиите на Меѓународниот кривичен суд беа ставени на меѓународна потерница“, се вели во објавата на веб-страницата на Канцеларијата.
Во март 2023 година, Меѓународниот кривичен суд (МКС) издаде налози за апсење на Путин и комесарката за права на децата Марија Лвова-Белова, тврдејќи дека тие се „наводно одговорни“ за нелегалниот трансфер и депортација на деца од Украина и окупираните територии во Русија.